Milani “braktis” Mario Balotellin

Milani jep një sinjal të qartë për Mario Balotellin, duke refuzuar   ta apelojë vendimin me tre javë pezullim për sulmuesin pas gjesteve jo sportive në përfundim të ndeshjes kundër Napolit. Fillimisht deklarata kundër sulmuesit nga ana e zv/trajnerit Mauro Tassoti dhe tashmë vendimi zyrtar i shoqërisë për të mos ndërmarrë asnjë hap ligjor, e kryqëzojnë super-Marion me shpatulla pas pas murit. Lajmi bëhet i ditur nëpërmjet një komunikate zyrtare nga ana e klubit italian që shton gjithashtu se në apel do të çojë vetëm vendimin për mbylljen e pjesës jugore të stadiumit. Një qëndrim që tregon qartësisht pozicionin e shoqërisë në këtë çështje edhe pse Milanit do t’i duhet të luajë pa sulmuesin kryesor në tre ndeshjet e ardhshme, përfshirë edhe përballjen kundër Juventusit. Me këtë gjest, shoqëria kërkon të distancohet nga sjellja e lojtarit, duke mos i dalë në mbrojtje, çka mund të shkaktojë edhe një krisje mes MIlanit dhe Balotellit që është konsideruar përherë si një pikë referimi në ekipin e drejtuar nga Massimiliano Allegri.