“L’Equipe”: Honda te Milani për 4 vjet

Pas spekulimeve të shumta të javës së kaluar tashmë duket se gjithçka merr formë zyrtare. Keisuke Honda është një lojtar i Milanit dhe këtë e konfirmon e përditëshmja sportive franceze “L’Equipe” që shkruan se lojtari i përfaqësueses japoneze ka firmosur për kuqezinjtë. Prej shumë kohësh ishte bërë e ditur një parakontratë e 27-vjecarit nga Osaka me klubin e dytë më të famshëm europian, madje drejtuesit e Milanit dëshironin ta kishin në ekip që në merkaton e verës, por gjithçka mbeti në vend, pas bllokimit të këtij transferimi nga ana e drejtuesve të CSKA së Moskës. “L’Equipe” konfirmon tashmë kalimin e japonezit te kuqezinjtë, por gjithashtu edhe faktin se ka qenë vetë Honda që ka mbyllur gjithçka duke firmosur përfundimisht marrëveshjen me Milanin, në një kontratë që e mban atë të lidhur me këtë ekipi deri në 30 Qershor të vitit 2018.

Keisuke Honda ndihmoi Japoninë për të hyrë mes 16 skuadrave më të mira të botërorit të fundit dhe ka luajtur për një periudhë pothuajse 4-vjeçare për klubin moskovit. Për të ishin të interesuara gjithashtu edhe skuadra të tjera si Juventus, Monaco e Liverpool, megjithatë konkurrenti më i fortë i kuqezinjve ishte klubi i Tottenham Hotspur. E përditshmja japoneze “Sports Nippon” javën e kaluar konfirmoi bllokimin e marrëveshjes, për shkak të ndërhyrjes së fortë të londinezëve, megjithatë me sa duket tentativa e gjelave për të bindur Honda-n që të luajë në Premier dështoi dhe decizive ka qenë vetë dëshira e lojtarit për të luajtur me një ekip të famshëm si ai i Milanit. Administratori i deleguar i kuqezinjve pati insistuar prej kohësh që çështja e japonezit ishte thjesht çështje kohe, por me të siguruar marrëveshjen përfundimtare me palët dokumentet e tij do të depozitoheshin te autoritetet italiane të futbollit. Tashmë është gjithçka e mbyllur dhe drejtuesit e Milanit madje i kursyen vetes edhe shifrën prej 5 milionë Eurosh që kërkohej për të nga klubi moskovit. Mbyllet kështu në mënyrë pozitive për klubin italian kjo telenovelë e gjatë dhe 27-vjeçari Keisuke Honda transferohet te kuqezinjtë me parametër zero. Kontrata aktuale e tij me CSKA-në e Moskës skadon më 31 Dhjetor dhe duke filluar që nga ditët e para të vitit të ardhshëm do të jetë i gatshëm dhe në dispozicion të trajnerit Allegri.