Raiola: Balotelli mund të bashkohet me Mourinhon

.Raiola: Balotelli mund të bashkohet me Mourinhon
Rinald Bregasi
Përditësuar: 29 Tetor, 2013

..
Pasi u hodh në sulm kundër mediave duke kërcënuar në mënyrë indirekte me lamtumirën e Balotellit nga Milan, me fjalët “Italia nuk është etapa e fundit e karrierrës së tij, ndoshta gabova që e risolla”, Mino Raiola hap shtegun e së ardhmes së sulmuesit kuqezi te Chelsea.

“Teorikisht Balotelli dhe Mourinho mund të riafrohen pasi Mario dhe Mourinho nuk u ndanë me urrejtje. Pati një episod pak të këndshëm por gjithsesi u ndanë mirë, kanë ruajtur kontaktet dhe ka vlerësim e respekt reciprok mes tyre. E di që Galliani nuk është i këtij mendimi, për Balotellin mund të thuhen shumë gjëra por jo që nuk është një sulmues i madh, sigurisht që është një sulmues i madh dhe ndoshta do të ishte mirë te Chelsea”.

Më pas Raiola ju rikthye argumentit për tutorin e Balotellit, hipotezë që e përgënjeshtroi para pak ditësh, dhe që i ka lënë një shije të keqe menaxherit të futbollistit.

“Fola personalisht me Gazzetta Dello Sport. Nuk dua ta fajësoj, për të thënë të vërtetën ishin të pakta mediat që e përcollën lajmin. Për shembull “Corriere della Sera” nuk foli kurrë për këtë tutorin, pasi një media serioze i verifikon gjërat para se ti shkruajë. Kam dhe lojtarë të tjerë te Milani, por kohët e fundit nuk kam dëgjuar asnjë pyetje për këta futbollistë të tjerë. Kam dëgjuar vetëm pyetje për Mario Balotellin dhe kjo është dicka që më irriton shumë, ndaj kam vendosur të mos flas më për Marion. Nuk kam thënë kurrë që të mos e gjykojnë si futbollist, të mos flasin për paraqitjet e tij, kam thënë që lini mënjanë lajmet nëse mban vath në vesh, nëse i jep një lloj maikne apo nëse mban kapele. Nuk shikoj një futbollist tjetër në Itali kaq të përfolur sa Balotelli. Edhe Hamsik ka kreshtë por për të nuk flitet kështu”.

Nga Balotelli biseda zhvendoset te Zlatan Ibrahimovic, një tjetër klient i Mino Raiolas. Sipas disa zërave të fundit, suedezi na qenka në shënjestrën e Major League Soccer, kampionatit të Shteteve të Bashkuara.

“ E di që ka patur një interesim për Zlatan nga ana e MLS, por Zlatan sapo ka rinovuar me PSG dhe ideja e tij është që ta mbyllë karrierrën te PSG. Pastaj të shohim nëse do të shkojë në Amerikë apo në ndonjë vend tjetër”.
.