Galliani dëshiron Xabi Alonson te Milani

Kur mbetet edhe pak kohë nga merkatoja e dimrit, Milani ka nisur të mendojë jo vetëm për përmirësimin e skuadrës por edhe për sezonin e ardhshëm. Pas përforcimeve të sigurta siç është Adil Rami për mbrojtjen dhe Keisuke Honda për sulmin, klubi kuqezi ndërkohë po mendon edhe për një portier që jep më shumë garanci, si dhe për një mesfushor me eksperiencë dhe me kualitete. Me aktivizimin ndaj Udineses, Gabriel i dha garanci jo vetëm skuadrës por edhe shoqërisë, që për momentin portën e kalon në planin e dytë pasi mbërritja e një mesfushori duket më emergjente.

De Jong e nisi sezonin në mënyrën më të mirë të mundshme, por ka treguar se çalon në kontrollin e topit. E njëjta gjë vlen edhe për Muntarin, ndërkohë që i vetmi që mund t’i jap ritëm lojës në mesin e fushës është Montolivo, por kur kapiteni është i dëmtuar, kuqezinjtë e vuajnë shumë mungesën e tij. Ja pse Galliani është duke menduar për një opsion ekstra në këtë repart dhe Xabi Alonso është emri më konkret. Aktualisht mesfushori ka një kontratë që skadon në Qershorin e vitit të ardhshëm me Realin e Madridit dhe Galliani përpiqet të nxitojë, pasi në Janar, spanjolli mund të vendosë për të ardhmen e tij.

Me ardhjen e Iscos dhe Illarramendit, Xabi Alonso është bërë një lojtar “part time” për madrilenët. Në fakt mesfushori i ka pëlqyer gjithmonë administratorit të Milanit, por fakti që mund të merret me parametra zero është një arsye më tepër për Gallianin. Deri tani nuk duket ndonjë pengesë në horizont për këtë transferim të bujshëm. Edhe Xabi Alonso, i cili për një muaj bëhet 32 vjeç, nuk besohet se në vitet e fundit të karrierës, mund të pranojë qëndrimin në stol, pavarësisht projektit fitues që mund të ketë Ancelotti. Ndërkohë që për grupin e Allegrit, spanjolli do të ishte i vlerësuar për eksperiencën që sjell, por gjithashtu do t’i garantohej aktivizimi në një klub me emër të madh, siç është Milani.