Milan, hija e Inzaghit mbi Allegrin

Pauza vjen në momentin më të mirë për Milanin. Në shtëpinë kuqezi duhet të qartësojnë idetë. Duhet ta bëjë para të gjithëve Allegri, por jo vetëm ai. Edhe Galliani ka shumë për të bërë. Pozitat e trajnerit kanë filluar të lëkunden, nuk mund të jetë ndryshe pas një tjetër fillim sezoni për tu harruar dhe një disfate me Juventusin. Edhe pse është ende herët të flitet për pushimin, ai mbetet një opsion që nuk përjashtohet. Gati për të marrë drejtimin është Inzaghi që e ka nisur krejt ndryshe sezonin e tij në krye të të rinjve kuqezinj.

Do të jenë dy javë reflektimi për të gjithë. Për teknikun loja është e gjitha për tu riparë. Që nga mbrojtja e deri te sulmi. Tetë pikë në gjashtë ndeshje dhe 13 gola të pësuar, 13 po aq sa pikët e distancës me Romën kryesuese. Allegri ja ka dalë të transformojë barazimet në Torino Bolonja dhe Amsterdam duke ju dhënë sharmin e gjysmëfitoreve, pasi kjo skuadër ka demonstruar se ka karakter dhe është kompakte me trajnerin. Dëmtimet janë vetëm pjesërisht justifikim për trajnerin livornez. Mbi të gjitha për sa i përket mbrojtjes. Zapata dhe Mexes dy qendërmbrojtësat titullarë kanë qenë gjithmonë në dispozicion dhe janë pikërisht ata që kanë gabuar më shumë se të tjerët. Nuk kanë mundur të japin ndihmën e tyre Kaka dhe El Sharawy, por do të kthehen pas pauzës, ashtu si edhe Balotelli, një nga më vendimtarët për Milanin. Edhe vitin e kaluar fillimi ishte shumë i keq, por më pas u arrit kualifikimi i vuajtur në Champions League. Sigurisht që edhe këtë sezon mund të përfundojë në të njëjtën mënyrë, por misioni mund të rezultojë shumë më i vështirë duke marrë në konsideratë nivelin e kundërshtarëve, ( Roma, Napoli, Juventus, Fiorentina, Inter dhe Lazio).

Trajneri nga ana e tij është i bindur se situata në krishtlindje do të jetë ndryshe, dhe nga njëra pauzë në tjetrën luan shanset e tij për të qëndruar në stol. Mbi këtë cështje duhet të arsyetojë Adriano Galliani. Pushimi i teknikut është një hap drastik, dhe aspak i praktikueshëm për momentin. Administratori i deleguar ka ende besim te Allegri dhe për këtë arsye do ta lërë të punojë në qetësi absolute në Milanello në këto dy javë. Me rikthimin në fushë do të jenë Udineze dhe Barcelona në San Siro. Aty duhet të jepen sinjalet e para të rilindjes për të evituar fundin e parakohshëm të aventurës kuqezi të Allegrit. Inzaghi është gati.
.