Birsa i dhuron fitoren Milanit, Udinese “ko”

Milani mori një fitore të rëndësishme në “San Siro” në javën e 8-të të Serisë A përballë Udineses. Formacioni i Allegrit, i cili vinte në këtë takim me shumë mungesa, ia doli të triumfonte me rezultatin 1-0 kundër ekipit të Guidolin. Goli për kuqezinjtë u realizua nga Birsa në minutën e 22’.

Edhe pse miqtë u munduan të çonin gjithçka në barazpeshë me anë të disa rasteve nga Di Natale,finalizimet nuk ishin të sakta. Me këtë sukses Milani ngjitet në koutën e 11 pikëve, teksa tashmë duhet të mendojë për sfidën delikate në Champions League ndaj Barcelonës ditën e martë.
Allegri i lumtur për rikthimin te fitorja
Fitorja e ngushtë kundër Udineses, rikthen buzëqeshjen në fyttyrën e trajnerit të Milanit, Massimiliano Allegri.

“Jam shumë i kënaqur pasi isha i bindur që skuadra do të zhvillonte një ndeshje pozitive. U treguam shumë të kujdesshëm ndaj një kundërshtari të vështir duke u lejuar vetëm pak hapësira”.

Notat më pozitive të kësaj skuadre në mbremjen e ftohtë të “San Siros” ishin portieri i ri Gabriel dhe mesfushori Kaka.

“Kam besim shumë të madh te Gabriel. E dija që do të zhvillonte një ndeshje pozitive prandaj i besova që nga minuta e parë. Kaka? Na dha një ndihmë të madhe teknike dhe psikologjike”.

Por Milani kundër Udineses u shfaq një skuadër e bashkuar ku skuadra tregoi shpirt grupi. Allegri e veçon këtë detaj duke thurur elozhe për djemtë e tij.

“E gjithë skuadra u shfaq në nivelin e duhur, madje edhe Matri që nuk arrin të shënojë por lufton shumë për grupin. Kjo fitore na duhej shumë si për moralin ashtu edhe për vazhdimësinë. Balotelli? Duhet të presim për të vlerësuar gjendjen e tij por është e vështirë që me problemin muskular që ka të rikthehet në fushë për 3 ditë. Ndaj Barcelonës do të jetë një ndeshje tërësisht e ndryshme”.

Me këtë fitore, Milani u ngjit në kuotën e 11 pikëve, ndërsa në mesjavë pret Barcelonën për ndeshjen e tretë të Grupit H të UEFA Champions League.